AHRC-in GMCH chhui tur High Level Inquiry Committee din

Assam Human Rights Commission (AHRC) chuan Gauhati Medical College & Hospital (GMCH)-a mipa nau-pang kum thum mi thisen pek aṭanga HIV+ a kai chungchang chhui turin high-level inquiry committee a din.

Assam-a mipa naupang kum thum mi lek chu kum 2015 khan a taksa nasa taka a kan avangin Gauhati Medical College & Hospital-ah hian dah luh a ni a, a taksa hi a kan nasat em avangin vawi tam tak zai a ni. Rei tak enkawl a nih hnuah nikum vek khan GMCH hi an chhuahsan a, kumin kum tir lam khan GMCH bawk hian dah luh leh a ni. He mipa naupang hi thisen pek a ni a, a hnuah HIV+ a vei tih hriat a ni. He mi chungchangah hian naupang nu leh pate chuan Doctor te chuan an fapain HIV+ a kai thu hi an hrilh lawk lo niin an sawi. Naupang nu leh pa te chu fimkhur thu hlaah an thisen test sak an ni a, HIV+ hrik hmuh a ni lo. Naupang nu leh pate chuan an fapa hi GMCH-a an luh hma hian HIV hrik a pai an hriat loh thu an sawi bawk. He mipa nupang hian a thisen dawn aṭanga HIV+ kai a ni em tih hriat a la nilo a, chhui chian mek a ni.

State Chief Secretary chuan high level inquiry committee te chuan he thil thlenga mawhphurtu an zawng chhuak dawn a, he thila inhnamhnawih doctor leh nurse tu pawh nise zawn chhuah tur a ni, a ti. Thil thlen dan hi ngun takin ni 30 chhung an chhui anga, report kimchang thuneitute hnenah an pe lut ang. Hetih lai hian National Network of Positive People (NNPP) te chuan Gauhati High Court-ah Public Interest Litigation (PIL) an thehlut a, he thil thlenga mawhphurtute chu dan anga hrem an phut thu an sawi bawk.

National Network of Positive People chuan thil thleng chu vanduai thlak an tih thu sawiin, a tuartute an lainat tak zet tih an sawi a, hetiang thil hi engtin nge sorkar Hospital-ah a thlen theih tiin zawhna an siam a ni. Vanduaina tawk chhungkaw hnenah an phu ang ngeiin zangnadawmna pek an phut tih sawiin, tun hnuah chuan thleng tawh lo se an duh thu an sawi bawk. NNPP member Jahnabi Goswami chuan he thil thlen hnu hian mi panga te chuan fimkhur thu hlaah an thisen an test tir a ni a ti ve bawk.

Assam sorkar chuan he thil thleng avang hian State blood bank te tihchangtlunna turin cheng vaibelchhe 5 a ruahman nghal a ni. Hetih lai hian GMCH superintendent AK Bezbaruah chuan thil tam tak chhuichian ngai a awm thu sawiin, mipa naupang hian engtik hun laia HIV vei nge a ni tih chu chhuichian ngai a ni,a ti. Thla ruk chhung chu he naupang hi an Hospital chu a chhuahsan tih sawiin, eng enkawlna pek a nih kan hriatpui lo a, khawi Hospital-ah nge an kalpui tih pawh kan hrelo a, thutlukna siam a nih hmain zirchian tur tam tak a awm a ni, AK Bezbaruah chuan a ti.

He mipa naupang vanduina tawk ta hi Gauhati Medical College & Hospital-ah hian kum 2015 April 15 khan dah luh a ni a, a taksa 40% chu a kang a ni. Hun rei tak enkawl a nih hnuah GMCH aṭang hian October 3 khan lak chhuah a ni a, kumin March 29 khan admit nawn leh niin, vawi eng emaw zat zai leh a ni bawk.