Manipur MLA-in raltlante thawn kir turin CM ngen

Manipur MLA, Leishiyo Keishing chuan Kamjong district chhunga Myanmar aṭanga raltlan an tam lutuk chu veiawm a tih thu sawiin, Manipur chief minister N Biren Singh hnenah hma la turin a ngen.

MLA Keishing hian raltlante chu an ram lama thawn kir emaw chhawmdawlna in lama daha uluk taka ven an ngai tih a sawi. Raltlan pung zel chu ngaimawhawm a tih thu sawiin, nakin lawkah chuan helaia chengte aia an tam mai a hlauhawm niin a sawi bawk.

Phungyar bial aṭanga thlan tlin MLA hian Manipur CM hnenah lehkha thawnin, nikum November thla aṭang khan Myanmar buai avangin an state chhungah raltlan 5,800 an awm tawh tih a tarlang a, heng zinga 5173-te chu Kamjond district thuneitute'n an biometrics an laksak tawh tih a sawi. State sorkar hmalakna hnuaiah raltlante hi chhawmdawlna in lamah dah an nih ṭhin thu tarlan a ni bawk.

MLA chuan raltlante chu an ni tin mamawh ṭha taka pek an nih thu a lehkhaah chuan tarlangin, hetih rual hian helaia chengte hian raltlante vangin harsatna an tawk ṭhin niin a sawi. Ramriah police indaih lohna a nasat avangin dan leh hrai kenkawh kawngah harsatna an tawk niin a sawi bawk. Keishing chuan raltlante nen an chin dan a inan loh avangin harsatna an tawk fo tih a sawi.

Keishing chuan raltlan tam avangin Kamjong district chhungah mi ruk bo leh tualthahna a thleng tam niin a sawi a, heng pawikhawihtute hian awlsam taka ramri an kan ṭhin avangin man chhuah an harsa hle a ni, a ti. Heng an harsatna tawh hrang hrang avang hian raltlante chu an ram lama thawn let turin Manipur Chief Minister chu a ngen a ni.