Sikkim : Traffic enkawlna pui turin AI thiamna hmang dawn

Sikkim Transport department chuan tun thla ni 25 aṭangin traffic enkawl kawnga pui turin Artificial Intelligence (AI) an hmang dawn. Traffic enkawl kawnga AI thiamna hman an tum chhan hi traffic management changkang leh tunlai zawk an duh vang nia tarlan a ni.

Artificial Intelligence (AI) driven Traffic Management System hman thar tur hian awlsam zawkin document chi hrang hrang- Insurance, Tax, Fitness, Pollution Under Control (PUC) leh Permit fel leh fel loh a enfiah thei dawn a, heng bakah hian lirthei khalhtute dan bawhchhiatna chi hrang hrang chu a hre thei dawn bawk a ni. Transport department-te'n an hman tum AI thiamna hi thuneitute chuan an pawmpui tawh a, May 25 aṭangin Sikkim-ah hman ṭan tur a ni ang.

Sorkar hotute chuan thuchhuah siamin lirthei neitute leh khalhtute zawng zawng chu an document-te tifel turin an chah a, E-challan lak chhuah kawnga harsatna an tawk a nih chuan district chhunga SP emaw RTO hnenah an harsatna thlen turin mipuite chu an chah bawk a ni.