JJM kalpui danah dik lo a awm lo : Meghalaya PHE Minister

Meghalaya-a Garo Hills-a Jal Jeevan Mission hna kalpui danah thil dik lo a awm tia puhna chu PHE Minister, Marcuise Marak chuan chhang letin JJM kalpui danah thil fel lo a awm lo tih a sawi. Marak chuan JJM chu langtlang leh hlawhtling taka kalpui a ni tih a sawi tel bawk.

PHE Minister chuan JJM hnuaiah hna 77.38% thawh zawh tawh a nih thu sawiin, chenna in nuai 5 chuangah tui herh haw theiha siam a ni tawh a ni, a ti. Hetiang hlawhtlinna an chan laia JJM chu inbumna mai a ni tih leh, hnathawh danah thil dik lo awm anga sawi chu atthlak a tih thu a sawi bawk. JJM hnuaia hnathawh nana pawisa an pek chhuah dan chu tarlang bawkin, Marak chuan langtlang taka pawisa pek chhuah a ni tih a sawi.

Sorkar laipuiin March 31, 2024 hmaa in zawng zawnga tui herh haw theihna dah a tum chu Meghalaya hian hun tiam chhungin an tihlawhtling hman dawn lo a, hei vang hian a tihhlawhtlinna atan August 2024 thleng hun pek belh turin sorkar laipui a dil. Marak chuan contractor hnathawk ṭha lote chungchang an ngaihtuah tih sawi bawkin, midang hnena hna pek thlenga an ngaihtuah thu a sawi a ni. Mipuite chu JJM hnuaia hnathawh endik kawngah an pawimawh tih sawiin hnathawk ṭha lo contractor-te chu sorkar hnena hril hre ṭhin turin a chah.

JJM-a thil dik tawk lo awm nia lang, LokAyukta-in an chhui chianna report chu a dawn ve loh avangin a hriatpui lo tih Marak chuan a sawi a, hna chungchanga buaina an neihte chu Model Code of Conduct hlih a nih huna chingfel turin sorkar hnathawkte a hriattir tawh niin a sawi bawk.