Naga-Assam Dialogue Forum din dawn
Nagaland leh Assam-a civil society-te chuan state pahnihte inkara inhriatthiamna ṭha zawk a awm theihna tura hma la turin Naga-Assam Dialogue Forum din an rel.
Naga Hoho president P Chuba Ozukum chuan hun rei tak aṭangin tawhin state pahnihte tana common platform siam hian lo duh tawh tih sawiin, Inrinni khan civil society hrang hrangte chuan sawihoin Forum din hi a thuphungin an remti tawh tih a sawi.
Forum hi Assam Satihya Sabha leh Naga Hoho pawlten an kaihruai ang a, state pahnih aṭangin a tlem berah member 15 ve ve ruat an ni ang. Forum hian Naga leh Assemese te inkarah inlaichinna ṭha leh inhriatthiamna a awm theih nan hma an la dawn a, a bikin state inri-na hmuna chengte dinhmun chu an ngaihtuah sak dawn a ni.
State pahnihte inkar boruak ṭha zawk siam a ni theih nan hian Inrinni khan Assam Sahitya Sabha leh Naga Hoho huaihawt hian Assam leh Naga civil society hrang hrangte chuan meeting an nei a ni. Meeting zawha chanchin thar lakhawmtute a kawmnaah, Nagaland minister hlui Tiameren Aier chuan ramri chungchang kum rei tak state pahnihte buaina lo neih tawhte sawichhuakin, tun thlenga an buaina chinfel a lo ni lo chu politician-ten an ngai pawimawh em ni tiin zawhna a siam a ni.
State pahnih-a civil society hrang hrangte chu an buaina chingfel tura an state sorkar leh mipuite nawr turin a ngen bawk a, harsatna ching fel tur hian state pahnihte chuan cultural exchange, insumdawn tawnna leh mipuite intlawh-tawn hun siamte chu a ṭangkai a rin thu a sawi.
Aier chuan, "Lungrual taka kan thawhho loh chuan, sorkar laipui leh state sorkarte chuan chhuanlam an siam zel ang a, buaina hi chinfel lohin a awm reng dawn a ni" a ti.
Nagaland Parliamentary Secretary for PWD (Housing) Levi Rengma chuan, "Kan duh emaw duh lo emaw, Assamese leh Naga-te hi kan inṭhenawm reng dawn a, hei vang hian inring leh inhmangaih tawna kan awm hi a ṭha ber a ni" tiin a sawi. Tun hma lama buaina an lo neih ṭhinte chu an sawichhuah a, an hriatreng chuan hma an sawn thei dawn lo a, a tuartu chu mipuite an ni dawn a ni, a ti.