Nagaland-ah thli tlehin in 3759 len chhia

Nagaland state chhung hmun hran hrangah thlipui tlehin thla hmasa chhung khan chenna in 3,759 a len-chhia niin Nagaland State Disaster Authority (NSDMA) chuan Chief Minister TR Zeiland hnenah a hrilh.

Kar kalta Inrinni khan NSDMA hian CM hnenah report hi a thehlut a, an report-ah hian thlipui tuartu chhungkuate ṭanpuina atan cheng vaibelchhe 2.5 semchhuah a ni tawh tih an sawi bawk. CM hian thlipui tuartu, Mokokchung kbial chu thlawhtheihna hmangin a lo en tawh bawk a ni.

NSDMA report chuan thlipui leh rialtla-in Suruhoto khuaah in 671 leh thlai chinna ram hectare 30-a zau a tihchhiat thu an sawi a, vanduaina tawk chhungkaw hrang hrang hnenah ṭanpuina Rs 39,58,900 an sem thu an sawi bawk.

Mokokchung district-ah chuan thli leh rial-in in 1,382 a tichhia a, heng zinga in 283 chu luah tlak tawh loh khawpin a nuai chhia a ni. Electric ban 71 a tlu a, lui khuahna hmun 50 a chhe tel bawk. He district-a chhiatna tawkte ṭanpuina atan hian Rs 72,90,800 sem a ni.

Longleng district-ah chuan rial tlain thingtlang khaw 34-ah chhiatna a thlen a, in 342 a chhia a, luah zui tlak lohin in 56 a awm. Chhiatna tawkte ṭan-
pui nan hian Rs 23,48,700 sem a ni.

Wokha district-ah pawh in 449 a chhia a, chhawmdawlna atan Rs 18,14,400 sem niin, Mon district-ah pawh in 614 chu thli leh rialin a tichhia a, ṭanpuina sum Rs 53,33,300 sem a ni tawh.