Meitei hnena ST status pek duh lo

Manipur-a Meitei-te Scheduled Tribed status pek tum chu tribal pawl hrang hrangten an duh lo.

Kar kalta Inrinni khan Imphal-a Lamyanba Shanglen-ah tribal pawl hrang hrangte hian convention an huaihawt a, All Manipur Ethnical Socia cultural organization (AMESCO) advisor Yangsosang Koiren chuan Meitei-ten ST status an phut chuan buaina a tizual zawk tih a sawi.

Koireng chuan, "Koireng hnam ka ni a, hnam dang te buaina chungchanga lo inrawlh chu thil ṭha a ni lo tih ka hria. Mahse keini tribal mipuite hi Meitei-te ST status pek an nih chuan kan lawm lo hle ang" a ti. ST demand committee-in Meitei te ST status pek a nih chuan hnam hrang hrangte inpawhtawnna a siam dawn nia a sawi chu a pawm loh thu a sawi a, hei hian hnam tlem zawk te lakah harsatna lian zawk a thlen dawn a ni, a ti.

Academician Dr Homen Thangjam pawhin Meitei-te tana ST status dil a nih chhan chu rilru zim leh mahni hmasial vang a ni tiin, ramchhung ST tana quota tlemte dah chu an it vang niin a sawi. Union home secretary hlui JK Pillai-an Meitei-te ST status pek an nih chuan Manipur-a inlakhran duha hel vanga buaina awm ṭhin a tawp phah dawn nia a sawi chu a dik lo a ni, a ti bawk.

Thusawitu dang, Chinglen Meisham pawhin tribal-ten harsatna an tawh hrang hrangte a sawi rualin, Meitei-te tana ST status phut chu politics lama hlawk tumna mai nia a ngaih thu a sawi bawk.