Assam-in Border Outpost 34 din belh dawn

Assam sorkar chuan inter-state border-ah outpost thar 34 din belh turin hma a la mek a, hei hi inter-state border 81 awmsa belhchhah leh tih chakna tur a ni ang.

Border outpost dinna atan hian sum pek chhuah tawh a ni a, Public Works Department chuan outpost 27 siam hna a thawk ang. A dang pasarih chu Assam-Nagaland border kutah hlan a ni ang a, Jorhat district-ah pathum dah a ni ang a, Hamren-ah pali, Sivasagar pali leh Golaghat-ah te outpost panga dah a ni ang. Hei bakah hian Arunachal Pradesh border-ah outpost hi pasarih dah tura ruahman a ni a, Lakhimpur district-ah pathum leh Sonitpur-ah pali te dah a nih dawn bakah, Kamrup (2), Dima Hasao (6) leh Hailakandi (2) ah te dah a ni bawk ang.

Assam sorkar chuan hei hi venhimna khauh zawka ken kawh a nih theih nana hmalakna an nih thu sawiin, sum sen zawng zawng hi state sorkar chuan a tum dawn a ni Home commissioner LS Changsan chuan a ti. Assam hi a ṭhenawm state te nen ramri chungchangah vawi eng emaw zat a lo buai tawh ṭhin a, chu mi sut kian nan leh khauh zawka venhimna kenkawh theih nana a hmalakna a ni. Border outpost zawng zawngah hian armed security platoon khat zel awm tura ruahman a ni. Kum 2014 khan Assam-Nagaland border-ah hian buaina nasa tak a chhuak tawh a, mi 12-in nunna an chan bakah hliam eng emaw zat an awm a ni.