NPLFM ten Anti-tribal Bill ṭha ti lo

Naga Political Leaders’ Forum Manipur (NPLFM) chuan Manipur State Assembly-in kum 2015-a ‘Three Anti-tribal Bills’ a pass chu an dem thu sawiin, he mi duh loh lantir nana nawrh huaihawt a ni chu an thlawp thu an sawi. Naga Political Leaders’ Forum Manipur te hian ‘Three Anti-tribal Bills’ chungchangah hian meeting an nei a, poli-tician challang tak tak, MLA, ex-MLA, ex-MP, MDC, ex-MDC leh pawl hrang hruaitute bakah Naga Hohos member mi eng emaw zat an tel a ni.

Manipur-a pawl hrang hrangte chuan 'Anti-tribal bill' duh lohna lantir nan hian May 16 zan lai
aṭang khan darkar 48 awh nawrh an huaihawt leh a ni. NPLFM chuan 'Anti-Tribal Bill' chung changa an ngaihdan sawi chhuakin tribal ten nasa taka an dodal chu awm an tihpui tih sawiin, an harsatna chu an hriatthiampui tak zet thu an sawi.

Tarung Community Hall-ah he mi chung chang ngaihtuah hian emergency general body meeting nimin khan an nei a, sorkar laipui-ah sut leh tura ngen ni se an ti a ni. BD Behring MLA ni ṭhin Soso Lorho leh Jangamlung Panmei te chuan meeting hi an telpui a, Manipura-a Joint Action Committee ten darkar 48 awh tur nawrh an huaihawt mek chu thlawp ṭha an tih thu an sawi ve bawk. JAC ten Three Anti-tribal Bill duh loh avanga nawrh an huaihawt hi May 16 zanlai aṭang khan ṭan a ni a, May 18, 2016 thleng a awh dawn a ni.

BD Behring chuan, The Protection of Mani-pur People (PMP) Bill, 2015 chu documents mumal awm loa pass a ni a ti a, hei hi dan kalh a nih thu sawiin, Bill chu hnawl tur a ni, a ti. Manipur Land Revenue and Land Reforms (Seventh Amendment) Bill 2015 leh the Manipur Shops and Establishment (Second Amendment) Bill 2015) te chu section 4(1) and (2) of Article 371C of Indian Constitution, paras 3 leh 10 kalh a ni a ti. Hill Areas Committee te he Bill dodal tlat turin a duh tih Behring chuan a sawi bawk.

Naga Political Lea-ders’ Forum Manipur te hian Manipur sorkar chu ‘three anti-tribal bills’ chu sut leh tura ngenin, dodalna lantirtu tribal mi pakua zetin nunna an chan chu pawi an tih thu an sawi bawk. ‘Three anti-tribal bills’ duh lohna lan tir avanga nunna chan te ruang hi tun thlengin phum an la ni lo a, Chura-chandpur District Civil Hospital-ah dah a la ni. Manipura pawl hrang hrang te chuan ‘Three Anti-tribal Bills’ hi sut leh a nih theih nan kawng hrang hrangin hma an la mek a ni.