Meghalaya-ah hel man

Hynniewtrep National Liberation Council (HNLC) helpawl mi leh sa pali bakah United Liberation Front of Asom – Independent (ULFA-I) mi pakhat te chu Zirtawpni zan khan Meghalay-ah man an ni. Hel kut aṭang hian ralthuam leh puak thei thil te man tel a nih thu police te chuan an sawi.

Helte hi Pynursla-ah man an ni a, Bangladesh aṭanga lo lut nia hriat an ni a, Meghalaya khawpui Shillong-ah bomb tihpuah an tum nia hriat a nih thu East Khasi Hills district police chief M.Kharkrang, chuan a sawi. Special Operation Team te chuan ULFA-I mi Bikhat Ahom chu Assam Bongaigaon bialah an man tih M.Kharkrang chuan a sawi bawk. Ahom hi bomb expert nia hriat a ni a, Assam-a pawikhawihna thleng tam taka a inhnamhnawih tih hriat a ni bawk. Special Operation Team hian hel kut aṭang hian rifle pahnih, pistol leh puak thei thil kg 10 reta rit an man tel a ni.

Hetih lai hian Garo National liberation Army (GNLA) mi leh sa 24 zet chu Zirtawpni vek khan Meghalaya State Chief Secretary K.S. Kropha, DGP Rajiv Mehta leh police official te kutah an inpe. Inpe zingah hian 'action commander' Hedeo Ch Momin, 'area commander' Chingnang bakah deputy area commander Sengrak M Marak West Garo Hills a mi te an tel a ni. Hei hi tun hnaia sorkar kuta GNLA mi leh sa inpe an tam ber ṭum a ni a, May thla chhung vek hian GNLA mi leh sa 30 zet te chu police kutah an inpe tawh a ni. Hel inpete kut aṭang hian AK, SLR rifle, pistol, anti-aircraft, medium machine gun ṭhahnem tak an man tawh a ni. Inpe zinga mi Alpha Ch. Marak chuan GNLA chief Sohan chu police leh Security Force ten beihpui an thlak avang hian Bangladesh-ah a bibo mek tih a sawi. Meghalaya state sorkar leh Security Force ṭangkawp te chuan hmun hrang hrangah hel dap chhuah hna hi an thawk mek a ni. Operation Hill Storm- III-ah bik hian hel 119 te chu an inpe tawh a, midang 136 zet man an ni tawh bawk.