Myanmar raltlan anmahni duh thu ngeia thawn let an ni : CSCHR

Civil Society Coalition for Human Rights (CSCHR), Manipur leh United States chuan tun hnaia Myanmar aṭanga Manipur-a raltlan, an ram lama thawn let mi 77-te chu anmahni duh thu ngeia thawn let an ni tih an puang.

International Commission of Jurists (ICJ) chuan Myanmar lama raltlan thawn lette chungchangah tihluihna awma an hriat thu an tarlan chu CSCHR chuan ziaka chhang letin, thawn let hna chu mumal takin district thuneitute'n an kalpui thu leh, an khaw lam a hma aia a ralmuan deuh tak avangin an duhthlanna ngeia an khaw lama thawn let an nih thu an tarlang. Raltlan thawn lette chu tu mah an tilui lo tih tarlangin, anmahniin an khaw lama let an duhna chu Manipur sorkar chuan a pui mai zawk a ni, an ti.

CSCHR chuan Manipur (India) leh Myanmar-a mimal dikna chanvo humhim kawnga ICJ-in ngaihtuahna a seng chu lawmawm an tih rualin,tun hnaia an thu tihchhuah ṭhenkhat chu dik tawk lo a awm niin an sawi. Myanmar aṭanga Manipur-a pem lutte chungchanga an ngaihdan pawh a dik tawk lo tih sawiin, a taka thil thleng nen a inpersan hle niin an sawi. CSCHR chuan Myanmar rama rorelna a mumal loh em avangin kum tam tak chhung chu Myanmar aṭanga Manipur-a pem lutte chungchang an zir chiang tawh tih tarlangin, mimal dikna chanvo palzut zawnga raltlan enkawl an awm ngai lo tih an sawi.

CSCHR report chuan kum 2021-a Myanmar a buai ṭan aṭang khan India ram chhung, a bikin Manipur leh Mizoramah raltlan ṭhahnem tak an rawn lut tih tarlangin, sorkar chuan anmahni chhinchhiah hna an kalpui bakah chhawmdawlna in siamsak hna an thawk a, theihtawpin buaipui mah se, raltlan tam zawk chuan heng chhawmdawlna inah hian awm duh loin anmahniin hmun hranah an inbengbel tiin an tarlang bawk. Myanmar aṭanga raltlan rawn lut, India rama inbenbel tumte hian dan hnuaiah khua leh tui nihna neih an tum lo niin an sawi. Heng harsatnate hi raltlan dawngsawngtu lam hian tawk mah se, vawiin ni thleng hian tihluihnaa thawn kir an la awm lo tih sawiin, sorkar hnenah chhawmdawlna leh chenna tur camp siamsak turin an ngen ṭhin zawk tiin an tarlang a ni.

May 7, 2024 thleng khan dan loa India ram rawn lut mi 5,457 Kamjong district, Manipur-ah an awm tih CSCHR chuan an sawi. Raltlante duh thlanna ngeia thawn let mi 329 an awm tawh tih tarlangin, dan loa rawn lut ni mah se, an lakah thubuai ziah luh engmah a la awm lo tih an tarlang bawk.