Nagaland cabinet-in FMR tihtawp ngaihtuah ṭha turin a thlen : Minister Kenye

Nagaland minister of state leh sorkar thupuangtu ni bawk, KG Kenye chuan sorkar laipui hnenah zalen taka inkalpawh theihna (FMR) titawp tura thutlukna a siam chu ngaihtuah ṭha leh tura an duh thu an thlen tih a sawi a, hemi atan hian state assembly chuan resolution an pass tih a sawi bawk.

Minister KG Kenye chuan FMR tihtawp duh lohna a lian hle tih sawiin, a bikin Myanmar ramri hnaiha chengte chuan an dodal nasa lehzual niin a sawi a, state assembly chuan resolution pawmin sorkar laipui hnenah FMR tihtawp chungchang ngaihtuah ṭha leh turin an thlen tih a sawi. Minister chuan tlawmngai pawlte chu dawhthei taka nghak tura a duh thu sawi bawkin, Nagaland sorkar chu FMR chungchangah sorkar laipui nen an inbepawp reng a ni, a ti.

Sorkar laipui chuan FMR chungchanga an thutlukna chu ngaihtuah ṭhat leh an tum tih Kenye chuan a sawi a, state sorkar hmalakna chu ringtawk tura a duh thu a tarlang. Naga hnamte'n India aṭanga zalenna an sual avanga buaina an neih ṭhin chungchanga hma la turin Political Affairs Committee (PAC) din a nih thu sawi bawkin, political party dangte chu PAC thlawpa Political Consultative Committees (PCCs) din ṭheuh turin a chah a, hemi hmang ṭangkai hian an buaina neihte chinfel a nih theih nana hmalakpui turin party dangte chu a sawm a ni.