Assam khawpui tam takah khaw lum a zual

Assam chuan khaw lum nasa tak hmachhawn mekin state chhunga khawpui tam takah chuan khaw lum dan ṭhin pangngai aia 5 degree celsius-a sangin a lum zual a ni.

Assam khawpui lian berte zinga mi, Guwahati-ah May 15, Nilaini khan khaw lum zawng chu 37.2 degree celsius-ah chhoin, hei hi khaw lum dan ṭhin pangngai aiin 5.4 degree celsius zetin a sang zawk tih weather department chuan an tarlang. Guwahati ai hian Tezpur chu a la lum lehzual a, a lum lai berin 38.1 degree celsius kaiin hei hi khaw lum dan ṭhin pangngai aiin 7.2 degree celsius zetin a sang zawk. Khawpui dang Dibrugarh, Silchar, Dhubri leh Jorhat-ah pawh khaw lum dan ṭhin pangngai chu khûm a ni ve bawk.

India Meteorological Department chuan ni eng emaw zat chu khaw lum hian Assam a la chamchilh dawn niin an tarlang. Hetih lai hian Regional Meteorological Centre, Guwahati erawh chuan state chhung hmun ṭhenkhatah ruah sur leh thlipui a thleng dawn tiin an hrilh lawk ve thung. Ruah a sur a nih chuan state chhunga khaw lum nasa lutuk pawh a ziaawm deuh beisei a ni.