SC-in Manipur sorkar hnenah UPSC exam turte ṭanpui turin hriattir

Supreme Court chuan Manipur tlangram lama cheng, UPSC exam tum zirlaite chu an veivahna kawnga ṭanpui turin Manipur sorkar a hriattir. SC in hetianga hriattirna a chhuah chhan hi UPSC exam turten Manipur pawn lam pan kawngah harsatna an tawh loh nana ti an ni.

Delhi High Court-in tlangram aṭanga Imphal huamchhunga exam tura kalte tan nitin Rs 1000 allowance pe tura a tih chu Chief Justice of India DY Chandrachud leh Justices JB Pardiwala leh Justice Manoj Misra te ṭhut bench chuan tidanglamin, Rs 3000 allowance pe turin Manipur sorkar chu a hriattir. Allowance chuan Imphal centre-a exam turte chauh huam loin, tlangram lama buaina chhuahna hmuna zirlaite pawh huam tel tir turin SC chuan a hriattir bawk.

Court chuan he hamṭhatna dawng thei zirlaite chu state sorkarin hetiang buaipui tura a ruat, nodal officer hnenah an chen mekna hmun leh an exam centre tur hrilh hre turin a ti a, nodal officer biak pawh theihna tur a tarlang tel bawk.

Manipur sorkarin Churachandpur leh Kangpokpi-ah UPSC exam centre a hawn theih loh avangin March thla khan Delhi High Court-ah Public Interest Litigation (PIL) theh luh a ni a, tribal zirlai UPSC exam hmachhawn tumten UPSC Preliminary exam an hmachhawn ve theih nan ruahmanna siamsak turin Court-ah ngenna an thlen a ni. PIL theh luh an ngaihtuah hnuah Delhi High Court chuan Manipur sorkar chu allowance pe tur leh, an veivahna ruahman sak turin thutlukna a siam a, mahse Imphal centre-a exam turte tan chauh a nih vangin Supreme Court chuan High Court thutlukna ṭhenkhat hi a tidanglam leh ta a ni.