Assam : Dan thar inzirtirna hun Guwahati-ah hmang

Ministry of Law and Justice chuan ni hnih awh dan thar pathum inzirtirna hun Guwahati-a an buatsaih chu nimin khan zawh fel a ni.

Sap ho hunlaia dan siam, Indian Penal Code 1860, the Code of Criminal Procedure 1973 leh Indian Evidence Act 1872 te thlakna tur Bharatiya Nyaya Sanhita 2023, Bharatiya Nagarik Suraksha Sanhita 2023 leh Bharatiya Sakshya Adhiniyam 2023 te chu July 1 aṭanga hman ṭan a nih tawh dawn avangin dan thar inzirtirna hun hi Guwahati-ah hman a ni.

Ministry of Law and Justice chuan May 18 leh 19 khan Assam sorkar nen ṭangkawpin Dr. Bhupen Hazarika Auditorium, IIT Guwahati Namati Jalah, Guwahati-ah dan thar inzirtirna hun hi an hmang a, thupui atan ‘India’s Progressive Path in the Administration of Criminal Justice System’ tih chu hman a ni. Assam Chief Minister Dr. Himanta Biswa Sarma chu chief guest niin Guest of Honour-ah Justice Hrishikesh Roy (Supreme Court Judge), Justice Biswanath Somadder (Sikkim High Court Chief Justice) leh Justice Vijay Bishnoi (Gauhati High Court Chief Justice)-te an ni. Heng mite bakah hian mi pawimawh ṭhahnem tak he hunah hian an tel bawk.

He hunah hian dan thar pathumte hi zirchian niin conference-a telte tan zawhna leh chhanna hun siam a ni. A ni hnihnaah chuan dan thar pathumte chu a mal ṭheuha zirchian niin mithiam kaihhruaina hnuaiah sawihona zau zawka neih a ni bawk. Dan thar hman ṭan a nih hunah mipui leh dan lam thiamten dan tharte an hriatthiam a, a kenkawh kawnga harsatna an tawh loh nana inzirtir leh inhrilhfiah chu he conference tum ber hi a ni.