Nagaland : SEC-in inthlan boycott lo turin ENPO a ngen

Eastern Nagaland People's Organization (ENPO)-in Nagaland State Election Commission (SEC) hnenah kar liamta Ningani khan Urban Local Body (ULB) inthlan, June 26 a neih tur chu boycott an tum thu an hrilh hnuah, SEC chuan ENPO chu an thutlukna ngaihtuah ṭha leh turin an ngen.

SEC chuan ENPO in Frontier Nagaland Territory an ngiat chu an hrethiam tih an sawi a, mahse an thil ngait a hlawhtlin nana a huhoa vote thlak loh an tumna erawh ngaihtuah ṭha leh tura an duh thu an tarlang. SEC chuan vote thlak emaw thlak loh emaw chu India danpui hnuaia mimal dikna chanvo a nih thu tarlangin, vote thlak lo tura mimalin thutlukna a siam kawngah midang emaw pawl emaw an inrawlh a rem lo a ni, an ti.

Nagaland chhunga ULB inthlan hi Supreme Court endikna hnuaia kalpui ṭhin niin inthlan tibuai thei zawnga chet lakna a awm a nih chuan dan hmanga hrem an ni ṭhin. SEC chuan dan hmanga hrem an nih loh nan SC thupek ngai pawimawh hram turin ENPO chu a chah bawk. Municipal leh Town Councils chu mipuite tana ṭangkai tak an ni tih tarlangin, heng municipal body-te hmasawn zel nan leh inthuamthar nan hian inthlan chu a pawimawh tih an sawi tel bawk.

SEC chuan mipuite tan inthlanna dik leh felfai buatsaih an tum thu an sawi nawn leh a, local-self government in a ken tel pawimawh tak, vote thlak emaw inthlana chuh ve chu mipuite duhthlanna a nih avangin zalen taka heng inthlana mipuite tel chu a pawimawh tih an tarlang. Heng avang hian ENPO chuan mipuite vote thlak lo tura an hriattirna chhuah tawh chu ngaihtuah ṭha leh turin an duh tih SEC chuan an tarlang a ni.