Sorkar tura rinkai BJP

Assam Legislative Assembly inthlan result chu May 19 hian puan a ni dawn a, Bharatiya Janata Party (BJP) chu sorkarna siam thei tura rinkai a ni.

BJP leh a thurualpui party te chuan seat awm zawng zawng 126 aṭangin seat 79-93 lak theih an inring. Assam inthlan neih zawh takah khan BJP te chu Asom Gana Parishad (AGP) leh Bodoland People’s Front (BPF) party te nen an ṭangho a, Congress party-in kum 15 zet sorkarna a chelh tawh chu paih thlak an tum a ni.

BJP hian an party malin seat 79-93 lak an inbeisei a, a thurualpui party te chuan seat 26-33 lak theih an inbeisei bawk.Congress leh Democratic Front (AIUDF) te chuan seat 6-10 vel chang turin BJP chuan an ngai a ni.

ABP-Nielsen-in a rin dan chuan BJP hian seat 81 vel la thei turin an ngai a, BJP thawhpui party-te chuan seat 33 leh Congress leh AIUDF chuan seat 10 la thei turah an ngai.

NewsX Chanakya ve thung chuan BJP hian seat 90 an chan theih an ring a, BJP hawhpui party ten seat 27, Congress leh AIUDF ten seat kua. He tih lai hian Times Now C-Voter chuan BJP leh a thawhpui party te chuan seat 57 an chan an ring a, Congress-in 41, AIUDF 18 leh Independent-in seat 10 te a ni.

BJP state unit vice president Santanu Bharali chuan, sorkarna siam tura rin kai an nih thu sawiin, a thlen dik ngei pawh an beisei tih a sawi. An party leh an thawhpui party-te chuan mipui beisei aia tam seat an lak theih a rin thu a sawi a bawk.

He tih lai hian Congress lam chuan hrillawkna leh rinthua party hrang hrangte seat chan tur zat tarlan chu thil rintlak loh a ni an ti.

APCC vice president Ripun Bora chuan Bihar, Delhi leh kum 2011-a an state election-ah ngei pawh rin lawk dante hi a thleng dik lo tih kan hmu tawh a, chiaina tur a awm lo a ni, a ti a, BJP leh a thawhpui party-te chuan sorkarna an siam loh tur thu a sawi ve thung.