Tura by-poll: Vote tla 75%

Meghalaya-a Tura Lok Sabha constituency by-poll chu boruak muanawm tak hnuaiah Thawhṭanni khan zawhfel a ni.

Vote tla zat hi 75% a tling phak a, vote thlak ni hian mi 6,22,189 te chuan vote an thlak a ni.

Garo Hills-a district panga-ah inthlan hi kalpui a ni a, Meghalaya politician ropui PA Sangma chu he bial aṭang hian ṭum kua zet thlan tlin a lo ni tawh a ni. Election Commission chuan vote thlak theih hun chhung hi tlai dar 4 thleng a tih laiin, Aglanggre polling station chu a hun hmaa election official ten an khar avangin complain thehluh a ni. Electronic Voting Machine (EVM) 11 zet chu a chian loh avangin thlak a ni bawk.

Tura Lok Sabha seat hi Cong­ress candidate Dikkanchi D Shira leh NPP candidate Conrad K Sangma te chuan an chuh a ni. An chhungte leh party hruaitute chuan an thlawp
ṭha hle a, Dikkanchi hi a pasal bakah Meghalaya Chief Minister Mukul Sangma te chuan an ṭawiawm a ni.