Assam CM-in NAAT khawl nei turin duh

Assam Chief Minister Tarun Gogoi chuan Health department chu HIV test-na khawl Nucleic Acid Amplification Testing (NAAT) nei thuai tura a duh thu a sawi.

NAAT hian awlsam takin thisena HIV hrik te chu a hmu zung zung thei a, mahse he khawl hi a man a to em avangin Assam-a Hospital zingah nei an awm lo a ni.

Tarun Gogoi leh senior Health official te chuan Thawhṭanni khan meeting an nei a, tun hnaia Gauhati Medical College & Hospital thil thleng chungchang an sawiho a ni. He hunah hian Gogoi chuan Health department chu HIV test-na khawl Nucleic Acid Amplification Testing (NAAT) lei tura a duh thu sawiin, hei hian an harsatna tawh tam tak a sut kian theih tur thu a sawi a ni.

Gogoi chuan Gauhati Medical College & Hospital-a mipa naupang damlo, thisen pek aṭanga HIV hrik kai nia hriat chu a tawrhpui thu sawiin, Health department chu he naupang hnenah hian zangnadawmna pe turin a ngen bawk a ni. Health official-te chuan Gogoi chu India HIV Estimates 2015 report hrilhin, hetih chhung hian an state-ah HIV hrik kai chu 0.06%-a a pun thu an hrilh a, hei hi National average 0.26% aiin a sang zawk a ni, an ti. February, 2016 thleng khan Assam-ah hian HIV+ mi 11,705 zet an awm a ni.

Inquiry Team-te chuan Gauhati Medical College & Hospital-a thil thleng chungchang an zirchianna report chu Chief Minister hnenah hian an hlan. Plastic surgery head of department Dr Seema Rekha Devi chuan naupang damlo an enkawlin Hospital a chhuahsan dawn khan HIV hrik a taksaah hmuh a nih loh thu sawiin, mipa naupang zainaah khan mi 13 te chuan an buaipui tih a sawi a ni. Mipa naupang hi a taksa 40% zet a kan avangin GMCH-ah hian hun rei tak enkawl a ni a, thisen unit sarih zet pek a ni bawk.