Manipur-in Covid-19 do nan Rs vcb 60 hmang tawh

Manipur chief minister N Biren Singh chuan state sorkarin Covid-19 dona atana a sum sen chu cheng vaibelchhe 60 a tling tawh tih a sawi. 

Hripui leng dona atana sorkarin a sum sen zinga a tam zawk chu Covid-19 test neihna atan te, quarantine centre siam leh enkawlna, district hrang hrangah Covid-19 care centre siamna atan leh, hri leng vanga hmun danga tangkhangte hruai hawna atan a nih thu a sawi. 

Singh chuan sum lamah indaih lo hle mah se, sorkar chuan hri leng dona atan chuan a theihtawp a chhuah reng tih a sawi bawk. 

Nilaini khan rapid antigen test kit 40,000 an chah thlen thu CM chuan a sawi a, hei bakah hian RAT kit 50,000 pawh an order leh mek tih a sawi. 

Covid-19 hri leng dona kawnga thawktu  hrang hrangten theihtawp an chhuah thu sawiin, Singh chuan health­care worker, volunteer, organisation, khaw­tlang hruaitu leh police-te inpekna chu fakawm a tih thu a sawi tel bawk a ni. 

Mipui leh sorkar thawhhona ṭha tak avangin an state-a hri kai hmuh chhuah, positivity rate pawh a tlahniam zel tih sawiin, tuna an positivity rate 4.77% chu ram pum huap rate aiin a hniam tawh hle tih chief minister chuan a sawi. 

Hripui thihpui, fatality rate pawh national rate aiin a hniam a, 0.64% a ni. Covid-19 sample test zat pawh a sang hle tih sawiin, mi maktaduai khatah 90,156 test ang an ni, a ti. 

Covid-19 hri chungchang chu hriat chian belh zel a ni a, hei vang hian ministry of health and family welfares (MoHFW) in kaihhruaina a siam angin an state-ah pawh hri kaite chu in lama inenkawl phalsak an ni tawh tih CM chuan a sawi. Manipur-ah hian hri kai zinga 600 vel chu in lamah an inenkawl mek a ni. 

State chhunga hri kai hmuh chhuah tawh hi  12,679 an tling tawh a, an zingah 9,719 chu dam leh tawhin hri kai mek hi 2,877 an la awm. 

Hri kai zinga 83 chuan an thihpui tawh a ni.