Meghalaya-in state mite tan tourist spot hawng dawn

Meghalaya sorkar chuan state mipuite tan bik tourist spot hrang hrangte chu October 16 aṭangin hawn a phalsak tawh dawn.  

Chief secretary MS Rao chuan thupek tichhuakin, an state chhunga tourist spot hrang hrangte chu state mipuite tan bik hawn a ni tawh dawn a, mahse heng hmunah hian Health and Family Welfare Department-in hri darh tur venna atana kaihhruaina a siam hrang hrangte chu khauh taka kenkawh a ni ang, a ti. Tourist spot enkawltu pawlte chuan an hawng duh a nih chuan an awmna Deputy Commissioner-te hriattir tura tih an ni. 

September thla khan state sorkar chuan trial basis-in tourist spot pathum - Ward's Lake, Elephant Falls leh Lum Nehru Park-te a lo hawng tawh bawk.