Manipur : KNF-in Kuki-Zo hnam tan rorelna hran an duh thu sawi nawn

Sorkar laipui leh Manipur sorkar nena inremna , SoO (Suspension of Operations) an neih avanga an ralthuam tung mek, Kuki National Front (KNF) chuan an din champha vawi 37-naah Kuki-Zo hnamte tan rorelna hran an duh tih an sawi nawn leh.

KNF chuan thuchhuah siamin Kuki-Zo hnamte tan Union Territory, rorelna in keng tel an duh tih an sawi a, an hnam mipuite tihduhdahna laka venhim chu an tihtur pawimawh tak a nih thu an sawi. KNF chuan home ministry ruahmanna anga tlangrama cheng Kuki-Zo leh Imphal phairuama chengte Meitei daidan nana siam 'Buffer Zone' chu pel loa zah turin Manipur mipuite chu an chah a, Kuki-Zo hnamte bei tura daidanna siam pel lui an awm a nih chuan an chhang let dawn tih an sawi bawk.

Kuki-Zo hnamte chu ṭawngtai thlah lo tura an chah bakah India danpui leh Court-ah rinna nghat tlat turin an fuih a, June thla hian central-ah sorkar thar piangin, thuneitute pawh inthlak mah se, rorelna hran an ngiatnaah an ding nghet tlat dawn tih an tarlang. Manipur buaina chinfel dan awm chhun chu rorelna hran pek a nih thu sawiin, hetianga chinfel a nih loh chuan state chhung buaina chuan ziaawm lam a pan thei dawn lo a ni, an ti.