Arunachal CM-in lui tihfai kawnga Indian Army hmalakna fak

Arunachal Pradesh chief minister Pema Khandu chuan lui tihfai kawnga Indian Army hmalakna chu lawmawm a tih thu sawiin, an lui chhanhim a nih theih nana tihdan thar an hman chu ṭha a tih thu a sawi bawk.

Chief Minister Khandu chuan Additional Directorate General of Public Information, IHQ, MoD (Army) hnenah lawmthu sawiin, lui bawlhhlawh thenfai nana floating barrier method an hmang chu ṭha a ti hle a, mumal taka siam a nih bakah luia bawlhhlawh (solid waste) a dang ṭha hle tih a sawi. Bawlhhlawh man khawm tura luia an dah hmanrua chu a zan avangin lui chim chin a san pawhin buaina an tawk lo a ni, a ti.

Khandu chuan luia bawlhhlawh awmte chu an thil zar chuan a dang ṭha hle tih sawiin, hemi bakah hian thil nawi leh vut pawh a dan tel avangin lui mawng lam chu a thianghlim phah niin a sawi bawk. An lui humhalh kawnga hma latu, Indian Army bakah mipuite chu a chhuang tak zet tih CM chuan a sawi bawk.