Assam : Karimganj-ah Mamata lim an hal

West Bengal chief minister Mamata Banerjee-in tun hnaia Ramakrishna Mission leh Bharat Sevashram Sangha hnuaia puithiam ṭhenkhat chu BJP tana thawk ṭhin tia a puhna chuan sawi zui a hlawh hle. Karimganj, Assam-ah Bharat Sevashram Sangha hnuaia ṭhalai pawl Hindu Suraksha Dal chuan Mamata thusawi an duh lohzia lantirna hun hmangin a lim an hal.

Mamata thusawi hian sakhaw inkaihhruai kawnga mi zahkai tak takte hming a tichhia niin Hindu Suraksha Dal chuan an sawi a, hemi avang hian an thinrim tak zet tih an tarlang tel bawk. Lungawi lo pung khawmte chuan Mamata thusawi an duh lohzia an au chhuahpui bakah ngaihdam dil tura an duh thu an sawi a, ngaihdam a dil lo a nih chuan tun aia nasa zawkin hma an la dawn tiin an vau zui bawk.

Hindu Suraksha Dal hotute kaihhruaina hnuaiah lungawi loh lantirna hi neih niin, mipui pung khawm hmaah Bharat Sevashram Sangha leh Ramakrishna Mission-in khawtlang leh ram tana an thil ṭha tih hrang hrangte an tarlang a, Hindu sakhaw rinnaa an pawimawhzia an tarlang tel bawk. Mamata chu heng pawl leh sakhaw puithiamte zah lo leh a hnungzuitu mi tam tak rilru tinaah an puh. Hindu Suraksha Dal thupuangtu chuan an sakhaw puithiamte zah lohna chu Hindu sakhaw zuitute zah lohna a ni tih sawiin, pawmzam theih a ni lo, a ti.