Inthlan dik leh felfai neih chuan BJP tan sorkarna siam a har ang : J Chaudhury

Tripura Communist Party of India-Marxist (CPI-M) state committee secretary leh leader of opposition ni bawk, Jitendra Chaudhury chuan inthlanna dik leh felfai neih a nih chuan Bharatiya Janata Party (BJP) tan sorkarna siam a harsa dawn tih a sawi.

BJP chuan mipui rinna an hloh mek tih Chaudhury chuan sawiin, an state chhunga Panchayat inthlan awm tur chu an party chuan an chuh ve dawn tih a sawi tel bawk. Chaudhury chuan Tripura State Election Commissioner thar chu tawnhriat nei ṭha tak leh officer dik a nih thu leh, SEC chuan inthlan lo awm tur chungchanga an inbuatsaihna pawh an party chu an hrilhhre tawh tih a tarlang.

Opposition leader Chaudhury chuan BJP an sorkar hnuah inthlan vawi khat mah dik leh felfai taka neih a la ni ngai lo niin a sawi a, Panchayat inthlanah chuhtu awm loa seat awm zawng zawng aṭanga 96% BJP-in an lak chu tunhmaa la thleng ngai lo thil a ni, a ti. BDO leh political party-te chuan meeting an nei tih sawiin, CPIM mi leh sate chuan meeting zawha an haw kawngah beih an tawk a, hetiang chiah hian Congress mi leh sate paw'n Kamalapur-ah beih an tawk tih a sawi ve bawk. Heng thil thleng hian BJP dinhmun a phet ṭan tih a entir niin a sawi a, eng inthlan pawh dik leh felfai taka neih a nih chuan BJP tan hnehna chan a harsa vek dawn a ni, a ti.

Chaudhury chuan Lok Sabha inthlan a ni emaw, Panchayat, TTAADC leh State assembly inthlan emaw pawh ni se, state chhunga BJP sorkar chuan hlauhna siam a tum niin a sawi. BJP sorkar chuan state chhunga zirna kalphung an tichhia tih sawi bawkin, zirlaite hma hun chu a ngaihtuahawm hle niin a sawi.