Sikkim-a khualzin tana khuahkhirhna thlahdul

Sikkim sorkar chuan Covid-19 leng vanga an state-a khualzin lut turte tana khuahkhirhna a siam chu thlahdulin, October 10 aṭang chuan khualzinte hnena Covid-19 negative certificate a phut ṭhin chu a titawp dawn. 

Khualzinte hian  Sikkim Tourism web portal aṭangin travel card an la ang a, hemi hmang hian hotel, travel agency leh motor hman tur pawh pre-booking a tih theih ang. Offline travel card hi state chhunga khawpui hrang hranga tourism information centre aṭangin lak theih a ni bawk. 

Sikkim-ah hian Rangpo leh Melli check post aṭanga lut tur tan travel card neih a ngai a, mahse a huhoa kalte tan pawh card pakhat pawmsak an ni thung. 

State tourism deptt-a additional secretary Kapil Meena chuan October 7 thleng khan card 75 pek chhuah a ni tawh tih a sawi. 

Nimin thlengin Sikkim-ah hian  Covid-19 kai hmuh chhuah 3,247 an awm tawh a, an zinga 2,569 chu enkawl dam ni tawhin hri kai mek 545 an la awm. Hripui vanga thi hi mi 52 an awm tawh bawk.