AP CM-in health department hotute kawm

Arunachal Pradesh chief minister Pema Khandu chuan Ningani khan state health department hotute chu  meeting neihpuiin, an state-a Covid-19 darh zel tur venna atana  hmalak dan turte a sawipui. 

Meeting-ah hian deputy chief minister Chowna Mein leh health minister Alo Libang te pawh an tel. 

CM chuan a kaihhruai sorkar chuan state mipuite hriselna chu a dah pawimawh ber a ni tih sawiin, hri laka an state an fihlim theihna turin a theih ang angin  hma an la zel dawn tih a sawi. 

Health department chu an thawktute leh an hmanraw neihte a ṭha thei anga hmang a, fund-te pawh ṭangkai taka hmang turin a chah. State sorkar chuan theihtawpa a puih dawn thu leh, hri leng vanga harsatna an tawh mek karah dik lo taka thilti an awm leh awm loh pawh a enfiah reng tur thu sawiin, health service chungchangah harsatna a awm tur a ni lo, a ti. 

Arunachal Pradesh-ah Covid-19  hmuh chhuah mi 11,479 an awm tawh. Hri kai zinga 8,679 chu an dam tawh a, hri kai mek 2,778 la awmin mi 22 in an thihpui tawh bawk a ni.