Tripura : CAA hman a nih chuan TPCC-in nawrh huaihawt tum

Tripura Pradesh Congress Committee (TPCC) chuan Citizenship Amendment Act (CAA) dan hman a nih chuan state chhungah nawrh huaihawt an tum thu sawiin, Tripura chief secretary hnenah pawh memorandum an theh lut dawn tih an sawi tel bawk.

Congress MLA, Roy Barman chuan CAA chu politics-a hamṭhatna zawnna mai a nih thu tarlangin, sorkar laipui leh state sorkarin CAA dan hmang ṭan turin hriattirna chhuahin, sixth schedule hnuaia awmte chu CAA chuan a kal kân dawn tih hriattirna tihchhuah chuan a tarlang niin a sawi. Party pakhat, CAA dodalnaa langsar tak chu BJP an thawhpui tak avangin CAA sawi mam nan sixth schedule area huam teltir a ni lo chu an ṭanchhanah an hmang a ni, a ti.

Roy Barman chuan Hindu tam tak khua leh tui nihna pek an nih hnuah Tripura Tribal Areas Autonomous District Council (TTAADC) huam chhunga cheng tribal-te chuan harsatna an tawk dawn tih a sawi. Ram dang aṭanga rawn lutte chuan India khua leh tui nihna an neih hnuah ram leilung fate ang bawkin India mi nihnain a ken tel hamṭhatna an dawng ve thei dawn tih sawiin, harsatna an la thlen dawn chauh a ni, a ti. Heng avang hian CAA hman tum a ni chu an duh loh thu sawiin, Tripura chief secretary hnenah memorandum an theh lut dawn tih a sawi a, CAA hman luih a nih chuan an party chuan Tripura pumah nawrh huaihawt an tum tih a sawi tel bawk.