Manipur sorkarin hmunhma hming mahni duhthua thlak khap

Manipur sorkar chuan tun hnaiah mahni duh thua Thangjing Hills hmuna 'Kuki National Front-Military Council' tih hming intar chu dan loa chetna a ni tiin thubuai ziak lut turin a hriattir.

State sorkar chuan Thangjing Ching chu Churachandpur-Khoupum Protected Forests huam chhunga mi a ni tih tarlangin, Manipur Art and Culture Department-in Manipur Ancient and Historical Monuments and Archaeological Sites and Remains Act, 1976 hnuaia ramngaw a humhalh a ni tih a tarlang bawk. Thuneitute chuan Imphal Police station-ah Zero FIR ziak lut tura hriattirin, hmunhma hlui leh hnam tana hmun pawimawh tak hming venhim chu a pawimawh tih an sawi.

Sorkar hriatpuina ni loa hmunhma hming thlak chu Manipur Names of Places Act 2024 leh 1976 Act section 4 bawhchhiatna a ni tih sorkar chuan a sawi a, hetianga dan pela chete chuan hremna an tawk zel dawn a ni, a ti.

Manipur chief minister, N. Biren Singh chuan 'Thangjing Ching' hming thlak chungchanga hma an lak dan chu social media lamah tarlangin, Manipur sorkar chuan mimal a ni emaw, pawl an ni emaw, sokar hriatpuina ni loa hmunhma hming thlaknaa inhnamhnawihte chu a zawng mek a, Manipur Names of Places Act, 2024 hnuaiah Thangjing Ching hming thlak avangin thubuai ziah luh a ni tawh tih a sawi bawk.