Assam : Sipajhar thuneitute'n chhungkaw 397 chenna in tihchhiatsak

Assam-a Sipajhar district thuneitute chuan Gorukhuti Agricultural Project kalpuina tura sorkarin ram a ruahman chhunga dan loa cheng, chhungkaw 397 chu hmun dangah tihluihnain an sawn chhuak a, an inte nawr chhiatsak an ni bawk.

Sipajhar Revenue Circle Officer, Ritimani Das chuan tun hnai khan chhungkaw 620 hnenah thupek chhuahin Dalgaon lama insawn chhuak turin a hriattir a, thupek chhuah a nih hnu pawh hian Gorukhuti Agricultural Project tana ram ruahmana dan loa cheng chhungkuate hi an awmna thar tura ruahman lamah an insawn duh lo a ni. Hei avang hian Thawhṭanni khan Sipajhar district thuneitute chuan tihluihnain an nawr chhuak ta a ni.

Lo neihna hmun tura ruahman-ah hian chhungkaw 397 chengte in chu bulldozer hmanga nawr chhiat niin, buaina lian tham a chhuah loh nan venghimtu za chuang a hmunah tirh an ni bawk. Gorukhuti Agricultural Project atan hian sorkar chuan ram bigha 8,700 a zau a pe a, hemi puala ruahman ram ṭhahnem takah hian dan loa cheng chhungkua 620 an awm a, heng zinga chhungkaw 397 chu nawr chhuah an ni ta a ni.