Sikkim : Gangtok-ah fur laiin lei laih khap

Sikkim khawpui, Gangtok district thuneitute chuan thupek chhuahin, leimin a tlem theih nan June 1 aṭanga September 30 inkar district huam chhungah lei laih an khap. Fur lo thleng tura leimin a tam loh nana hmalakna niin Gangtok district Collector Tushar G Nikhare chuan thupek hi a chhuah a ni.

Disaster Management Act 2005, hnuaia section 30-in a phût angin thuchhuah hi siam a ni a, lei laih thar chu khap a ni. Sikkim hi tlangram a nih angin fur laia leimin avangin harsatna an tawk fo ṭhin a ni. Gangtok DC leh District Disaster Management Authority (DDMA) chairman ni bawk, TG Nikhare-a thuchhuah siam hian leimin ven a nih theih nana lei laih emaw, thawmṭhat hna kalpui kawnga lei laihte erawh a huam tel lo thung.