Assam : Thingpui huana thawkte'n nawrh huaihawt PM leh Assam CM lim an hal

Assam-a Dibrugarh district huam chhunga thingpui huana hnathawkte chuan Thawhlehni khan nawrh an huaihawt. Hnathawktute hi hlawh lak loh rei vang leh an dinhmun chhe lutuk vangin an lungawi lo a ni.

Moran khuaa nawrh huaihawtte hi sorkar laipui bakah Assam sorkar leh Andrew Yule Company laka lungawi lo an ni a, Bamunbari leh Khowang tea estate-ah nawrh hi huaihawtin prime minister Narendra Modi, chief minister Himanta Biswa Sarma, Labour Minister bakah Andrew Yule Company hnuaia Chairman leh Managing Director te lim an hal.

Assam Tea Mazdoor Sangh (ATMS) kaihhruaina hnuaiah nawrh hi huaihawt niin thingpui huana hnathawkte harsatna hrang hrang tarlan a ni a, hnathawktute chuan thla thum chhung hlawh an la tawh lo tih sawiin, an hlawh lak tihkhawtlai ṭhin a nih bakah ration an dawn ṭhat loh thu te, damdawi lama enkawlna ṭha an dawn lohte, provident fund pek an ni loh thu leh Labour law hman a nih loh thu an sawi. ATMS thupuangtu chuan thingpui huana hnathawkte hian November 2023 hnuah mumal takin an hlawh, ration leh hamṭhatna dangte an dawng tawh lo tih a sawi a, an dinhmun hetiang a nih avang hian dam khawchhuak tura an beih nasat a ngaih thu a tarlang bawk.

Thingpui huana hnathawktu pakhat chuan an dinhmun khirhzia sawiin, thla hnih thla thum chhung chu hlawh an la tawh lo a, ei tur lei nan pawisa an nei tawh lo tih a sawi bawk. A dinhmun ang chiaha ding hnathawktu tam tak an awm bawk a, rilṭamin hna an thawk ṭhin tih a sawi.

Moran khua bakah hian Deamoolie tea estate, Doomdooma leh Rajgarh, Tingkhong-ahte nawrh hi huaihawt a ni bawk. Deamoolie-ah hian hnathawktute leh Assam Chah Mazdoor Sangha (ACMS) chuan thingpui huana an hotu, hnathawkte laka a inluling lutuk chu an duh lo a ni. Deamoolie tea estate manager hian thingpui huana hnathawkte chu ban mai a awlsam hle a, inentir avanga hnaa kal lote pawh a ban mai zel tih an sawi. ACMS chuan hnathawktu ban tawhte chu chhawr leh an phût tih sawiin, rorelna khawng taka kalpui chu hnathawktute tan thlah dul an duh tih an tarlang bawk.