Meghalaya : Shillong-ah E-Waste Management summit hlawhtling takin nei

Meghalaya State Pollution Control Board (MSPCB) leh India rama bawlhhlawh sawngbawltu company lian tak, Hulladek Recycling Pvt Ltd ṭangkawp chuan Shillong-ah hlawhtling takin E-waste Management Summit 2024 an huaihawt.

He summit-ah hian hmarchhak state te'n e-waste an sawngbawl dan leh hman nawn leh theih tura a buatsaih dan pawimawh tak tak sawiho a ni. MPCB chairman, R Nainamalai chuan mumal taka bawlhhlawh sawngbawl dan ṭha zawk a awm chuan MPCB chuan an thlawp tih sawiin, an summit huaihawt chu hmarchhak state te'n e-Waste sawngbawl dan ṭha zawk an neih theih nan a puih ngei a beisei tih a sawi bawk.

Hulladek Recycling Pvt Ltd Chairman & Managing Director, Nandan Mall chuan e-Waste sawng bawl chu environment tichhe lo zawnga kalpui a ngai tih sawiin, bawlhhlawh dang sawngbawl thei turin an company chuan hma an la mek tih a sawi. Tata Rewire, Mahindra Cero, leh Lico Waste Materials Pvt. Ltd. te nen an thawhhona chu an hlawkpui tih a tarlang bawk a ni.