Manipur : PLA mi leh sa paruk man an ni

Revolutionary People’s Front (RPF) hnuaia ralthuam keng pawl, People’s Liberation Army (PLA) mi leh sa paruk chu an ralthuam kawl lai nen Imphal West, Manipur-ah man an ni. Manipur police chuan nimin khan thuchhuah siamin, helpawlte hnen aṭang hian silai leh a mu bakah mobile phone leh an Gypsy hmanlai chu an mansak tih an tarlang. Helpawl an mante hi kum 24 aṭanga 49 inkar an ni.

PLA helpawl mi leh sa Lamsang khuaah an awm tih an hriat hnuah police chuan anmahni zawn hna an ṭan nghal a, darkar thum chuang an zawn hnuah helpawl mi parukte hi man an ta a ni. Helpawl leh an ralthuam kawl an mante hi Lamsang police station-ah hlan niin dan angin chhui zuina kalpui a ni ang.