Tripura sorkarin Bangladesh aṭanga chakkhai lak luh dan ngaihtuah

Tripura sorkar chuan Bangladesh aṭangin tuialhthei leh ni tin mamawh lak luh theih dan kawng an zawng mek tih Transport minister chuan a sawi. Hetianga hma an lakna chhan chu fur laia India ram hmun dang aṭanga chakkhai an lak luhna kawng a pin pawha an buai loh nana ti an ni.

Transport minister Sushanta Chowdhury chuan Assam aṭang chakkhai an lak luhna kawng leh, Agartala leh hmarchhak state dang pawhtu National Highway-te chu la rin chhunzawm tur ni tih sawi mah se, Jatinga Assam-ah rel kawng chhiat avanga chakkhai lak luh theih a nih loh hnuah Tripura sorkar chuan ngaihtuahna thar an seng a, tuialhthei leh ni tin mamawh dang lak luhna kawng dang a dap ta a ni, a ti.

Chowdhury chuan Agartala-Gangasagar (Bangladesh) rel kawng chu thla ruk aṭanga kum khat ral hnuah hman ṭan theih a beisei thu a sawi a, he rel kawng a tlang hunah chuan Bangladesh kaltlangin Kolkata aṭangin bungrua a lak luh theih dawn a ni. Tripura chief minister Manik Saha pawhin Agartala-Gangasagar rel kawng chu hman theih tura peih fel thuai tum a nih thu a sawi ve bawk.

Heng hmalakna bakah hian Indian Oil Corporation Ltd (IOCL) chuan Sekerkote, Sepahijala district-ah fuel depot an siam mek bawk a, hei hian tuialhthei lak luh kawngah harsatna an tawk a nih pawhin state chhunga hman tur chu eng emaw chen a phuhruk theih beisei a ni. Tripura Food and Civil Supplies Department chuan buhfai, tel, chi, chini, chhang phut buh leh pulses chu a chhek khawl ve mek bawk a, state chhungah ni 70 tla tur buhfai an neih bakah ni 28 tla chini, ni 45 tla chi leh ni 22 tla pulses an chhek khawl tih Tripura Public Distribution System chuan an tarlang.

Minister Chowdhury chuan fur lo thleng turah bungrua an lak luhna kawng ping mah se, Tripura mipuite chuan ni tin mamawh an tlakchham loh nan sorkar chuan ṭan a la mek a ni, a ti.