Assam : Khaw lum vangin Nagaon leh Lakhimpur district-ah sikul kai hun tidanglam

Assam-ah khaw lum a zual zel a, zirlai naupangte leh zirtirtute hriselnain a tawrh loh nan Nagaon leh Lakhimpur district chhungah sikul kai hun tihdanglam a ni.

Nagaon district-ah chuan nimin aṭang khan zing dar 8-ah sikul ṭan a ni a, zirlai naupang pawl zat azirin an bàn hun erawh a danglam thung. Primary school zirlaite chu zing dar 8 aṭanga chhun dar 12:30 thleng an kal a, middle school zirlaite chu chawhnu dar 1-ah an bang. High school leh higher secondary zirlaite chu chawhnu dar 1:30-ah bang tura tih a ni bawk. Thuchhuah hi sorkar sikul bakah, private school-ahte pawh zawm vek tura tih an ni.

Lakhimpur district-ah pawh nimin aṭang vek khan sikul kai hun tihdanglam a ni. Zirna inte chu zing dar 7:30-ah ṭan tura thupek chhuah niin, primary school zirlaite chu chhun dar 12-ah bángin, middle school zirlaite chhun dar 12:30-ah an bang dawn. High school leh higher Secondary zirlaite chu chawhnu dar 1-a bang tura tih an ni bawk.

Assam district pahniha sikul kai hun tihdanglam hi khaw lum nasa tak leh zual zelin zirtirtute leh zirlaite hriselnaah a ṭha lo zawnga nghawng a neih lohna tura hmalakna a ni. Zing lama sikul ṭan a nih hian khaw lum a zual tak tak hmaa zirlai zir hman an duh a ni.

Kamrup-ah tui intura inhriattir dar vawi thum vaw turin hriattir

Assam chhunga vek, Kamrup Metropolitan District huam chhunga Elementary Education Department thuneitute chuan inkaihhruaina thar an tichhuak a; khaw lum lutuk vanga zirlaite hriselnain a tawrh loh nan ni tin vawi thum tui in tura hriattirna dar (water bell) vaw ṭhin turin sikulte an hriattir. Hei bakah hian zing lama school assembly neih ṭhin pawh in chhunga nei turin sikulte chu an chah bawk.

Sikul tana inkaihhruaina dan zam thar hi Inspector of Schools, Kamrup Metro tihchhuah a ni a, zirlaite taksain tuiril tlakchham (dehydrate) lohna tura tih a ni. Thlan chhuak nasa lutuk leh lu na ven nan tui in tam a pawimawh tih thuchhuah chuan a tarlang bawk.

Zing kara sikul assembly neih ṭhin pawh pawn lama nei lo turin sikulte chu hriattir an ni a, daihlimah emaw, classroom chhungah emaw nei mai turin an hriattir a ni.