State Bank of Sikkim-ah sum tam tak khawih chingpen

Sikkimey Nagarik Samaj chuan State Bank of Sikkim (SBS)-ah a neitute hraitpuina tel loin sum cheng vbc. 69 pek chhuah a ni tih an hmu chhuak a, he thil hi kumin March 31-a audit an neih ṭuma hriat chhuah ni tawh mah se thla thum hnuah chauh thubuai ziah luh a ni.

SBS-a sum khawih chingpen a ni tih mipuiin an hriatin anmahni dawrtute leh an hnuaia pawisa dahtute chu an hlauthawng hle a, an pawisa khawl sa chu a him em tih zawhna a lian hle. Sum khawih chingpennaa inhnamhnawihte hriat la ni lo mah se SBS hnuaia thawk mi pathum chuan rinhlelh an kai hle a, anmahni chauh ni loin bank hnuaia thawk dangte pawh inhnamhnawihna an neih leh neih loh hriat thuai beisei a ni.

SBS Managing Director chuan, an thil tawn mek chu harsatna lian tham a ni lo tih a sawi a, mahse, Sikkimey Nagarik Samaj (SNS) chuan thil thleng chu uluk leh chiang taka chhui zui ngei an phut tih an tarlang. SNS chuan bank chu loan rul ṭha lote chhui chiang tura ngen bakah, hetiang thil a thlen nawn tawh loh nan tun aia tam audit neih an duh tih an tarlang bawk.

SBS hian pawisa khawih chingpen kawnga thubuai an neih vawi khatna a ni lo a, kum 2011 khan Rabongla-ah SBS hnathawk pakhat chuan account neitute pawisa pung a lo neihsak ṭhin a, SBS dawrtuten complaint an thehluh hnuah hriat chhuah a ni.