Manipur : Chawlhkar khat chhungin helpawl mi 18 man tawh

Manipur Police leh Central force-te chuan May 16, 2024, chawlhkar liam ta Ningani aṭanga nimin thleng khan hel pawl hrang hrang mi leh sa 18 an man tawh tih an tarlang. Hel pawla mite bakah, cheng nuai 2.22, silai leh a mu tam tak an man tel bawk.

Venhimna kengkawhtute chuan hel pawl dap chhuah hna phai zawla district hmun hrang hrangah ngawrh lehzualin May 16, 2024 aṭang khan an kalpui a; May 17 khan PREPAK hel mi leh sa pathum leh an pawisa cheng nuai 1.9 chu Thangal Bazaar aṭangin an man.

May 21 khan KCP (Taibanganba) hel mi leh sa pathum chu Khongjom area, Thoubal district-ah an man leh a, an sum kawl lai Rs 30,000 man tel. May 17 khan KCP (Taibanganba) mi leh sa pakhat leh a pawisa kawl Rs 2,500 man a lo ni tawh bawk.

Police thuchhuah tarlan danin, RPF/PLA hel pawl mi leh sa paruk chu Lamsang, Imphal West aṭangin May 21 khan man an ni a, KCP (People War Group) mi leh sa pali chu May 16 khan Thoubal district-ah man an ni.

May 16 hnu lamah vêk hian UNLF (P) hel pawl mi pakhat chu tihluihna hmanga sum a khawn vangin man a a ni. Manipur Police chuan an state chhung buaina chuan ziaawm lam a pan tih an tarlang.