Assam CM-in Mizoram nena inrina ramngaw humhalhah commando camp sak phalna dil

Assam chief minister Himanta Biswa Sarma chuan union environment minister Bhupender Yadav hnenah, Assam leh Mizoram ramria ramngaw humhalhah commando camp sak phalsak turin a ngen. Assam sorkar hian commando camp hi an sa tawh a mahse, dan anga sak a nih loh vangin tihtawp lailawk a ni thung, hemi a nih avang hian thil tih tawh hnua pawmpuina (post-facto approval) an dil a ni.

Assam Chief Minister chuan drone hmanga thlalakah Mizoram lam aṭangin reserve forest chhungah kawng siam, lei (bridge) dawh, police battalion camp leh office sak bakah khaw thar din chu chawl loin a thleng mek niin a sawi a, an chet lakna bial hi hectare 3,000 chuang zet a nih thu a sawi bawk. Ramri buai chu remchangah hmangin Inner Line Reserve Forest (ILRF) huam chhunga km 6 km - 10 km inkarah hmalakna a awm reng a ni, a ti. Heng bakah hian ramngaw humhalh chhunga thing kih tam tak a awm thu leh ramngaw chereu chak dante sawi langin, ramngaw tihchereuna a thlen reng laia commando camp sak nana ramngaw zau lo tak an pe phal si lo chu thil inrem lo tak a ni tih a sawi.

CM Sarma chuan July 26, 2021-a Mizoram nena an inkah chhan pawh sawiin, ramngaw humhalh chhunga chengte hnawh bo an tumna lamah Mizoram lamin an kap niin a sawi a, heng a nih avang hian ramngaw humhalh nan chauh ni loin venhimna thil avang pawhin commando camp chu sak a ngai a ni tiin, sak phalna pe turin environment minister chu a ngen.

Assam-in ramngaw humhalh chhunga commando camp an sak mek chuan Forest Conservation Act-a bawhchhia tiin sorkar laipui Environment, Forest, and Climate Change ministry chuan report a theh lut a, reserve forest huam chhunga hmalakna awm zawng zawng titawp turin thu a pe nghal a ni. National Green Tribunal (NGT) pawhin hemi chungchang hi January 2024 aṭangin a chhui chiang ve bawk. Assam sorkar chuan kumin April thla khan commando camp sak hna chu a chawlhsan tawh tiin NGT chu a lo hrilh tawh a ni. Heng a nih avang hian Assam CM chuan ramngaw humhalh chhunga hmalak phalsak turin union environment minister Bhupender Yadav hnenah ngenna hi a thlen ta a ni.