Tripura : BJP-in CAA chungchanga dawt thehdarh ṭhinah eptu pawl puh

Tripura-a rorel lai, Bharatiya Janata Party chuan Citizenship Amendment Act (CAA) chungchanga dawt thehdarh ṭhinah eptu pawlte chu puhin, CAA chu Inner Line Permit (ILP) hmanna hmunah leh Sixth schedule area-ah hman a ni ve dawn lo tih an sawi nawn leh.

BJP state president Rajib Bhattacharya chuan thu thar thehdarhtute nen an inkawmnaah CAA chuan Bangladesh, Afghanistan leh Pakistan aṭanga tihduhdahna tuar avanga December 30, 2014 hmaa India ram rawn lut, Hindu, Sikh, Jain, Parsi leh Kristian sakhaw zuitute chauh khua leh tui nihna a pe dawn tih a sawi a, eptu pawl lam chuan mipui rilru tiphawklek zawngin dawt an thehdarh ṭhin a ni, a ti.

Tripura chhungah CAA chu hman a nih pawhin khawltlang nunah leh politics thilah harsatna an tawh phah a rin loh thu BJP state president chuan a sawi. Mipui tihbuai nana dawt thehdarhtu, eptu pawlte chu a dem takzet tih a sawi bawk. Tripura sorkar hi CAA hmang ṭan turin a inbuatsaih mek a, hemi atan hian committee din turin hriattirna a tichhuak tawh a ni. Eptu pawl pahnih, Communist Party of India-Marxist (CPI-M) leh Congress chuan sixth schedule area leh ILP hmanna hmun chauh ni loin Tripura pumah CAA dan hman ve loh an ngiat mek a, an ngenna tihhlawhtlin a nih loh chuan nawrh huaihawt an tum thu an sawi.