Meghalaya : HYC hruaitute lakah thubuai ziak lut

Lum Survey, Meghalaya-a dan loa chengte hnawh chhuahnaa inhnamhnawihna nei nia puh Hynniewtrep Youth Council (HYC) hruaitu ṭhenkhat lakah Meghalaya Police chuan thubuai an ziak lut.

East Khasi Hills Superintendent of Police Rituraj Ravi chuan Sadar Police Station-ah thubuai hi ziah luh a ni tih sawiin, HYC hruaitu ṭhenkhat - president Roy Kupar Synrem, vice president Donbok Kharlyngdoh, assistant general secretary Isaac Basaiawmoit leh midang eng emaw zat lakah thubuai hi an ziak lut tih a sawi.

HYC hian Lum Survey hmuna chengte chu dan loa cheng an ni tiin an chenna in chu Ningani zing khan an tichhia a ni. Hetia mahni thua dan lo kengkawhtu, HYC-te chet dan hi a nunrawnthlakin dan phal loh a ni tih East Khasi Hills Deputy Commissioner SC Sadhu chuan a sawi. HYC chuan hetianga che tur hian district thuneitute hnen aṭangin phalna an hmu lo tih Sadhu chuan a sawi bawk.