Kuki leh Myanmar hel pui ṭhinah NSCN-in India sipaite an puh

National Socialist Council of Nagaland (NSCN) chuan Ningani khan thuchhuah siamin, India sipaite chuan India leh Myanmar ramria Naga Army beih nan Kuki leh Myanmar rama ralthuam chelek ṭhinte an hmang ṭangkai tih an tarlang.

Assam Rifles leh Indian Army (Para Regiment) chuan Kuki National Army (Burma) leh People's Defence Force (PDF) mi leh sate chu NSCN beih nan an thawhhopui ṭhin tih NSCN chuan an tarlang a, hetianga an chet chhan hi NSCN chu buainaa hnuh luh an tum vang a ni, an ti. Sorkar laipui nen Naga buaina chungchang chinfel dan kawng an zawn mek laiin hetianga chetna hi a thleng tih sawiin, India sipaite chuan Kuki helte chu ralthuam an pe ṭhin a, ramri kan tur pawhin an pui ṭhin tih an sawi bawk.

NSCN chuan India leh Myanmar ramria zalen taka inkalpawh theihna (FMR) chu tihtawp ni mah se, India sipaite'n KNA (B) leh PLA lam an ṭan avangin FMR tihtawp chuan awmzia a awm lo tih an tarlang a, Kuki helte chuan dangtu awm loin ramri chu an duh hunah an kân thei niin an sawi. Kuki raltlante chungchang pawh tarlangin, Naga khaw tam takah an inbengbel a, India sipaite puihnain pawikhawihnaah an inhnamhnawih ṭhin avangin an chenna khawtlang tan hnawksak an tling tih an sawi.