Hmarchhak state zinga BJP sorkarna hmasa ber Assam

Hmarchhak state zinga a hmasa ber ni turin Assam-ah Bharatiya Janata Party (BJP) sorkar a ding dawn ta. BJP hian State Assembly neih zawh takah khan seat awm zawng zawng 126 aṭangin a thawhpui party te nen seat 86 lain, chiang takin hnehna an chang. Kum 15 chhung zet rorel tawh Congress chuan seat 26 chiah a la a ni.

Inthlanah hian rin phak bakin BJP a che ṭha a, Congress Union Minister nilai te eng emaw zatin hnehna an changzo lo a ni. BJP hian party malin seat 60 an la a, party mala seat la hnem ber an ni bawk. Kum 2011 election-ah khan BJP hian seat panga chiah a la a ni. Kumin election-ah hian nasa takin BJP hian hma a sawn a, Brahmaputra leh Barak valley-ah te an che ṭha hle.

BJP thawhpui Asom Gana Parishad (AGP) chuan seat 14 lain, kum 2011 election-ah khan seat 10 an la a, an che chhe lo. Bodoland People’s Front (BPF) pawh Lok Sabha polls a chet chhiat hnuah hma rawn sawn lehin seat 12 a la a ni. Kum 2011 election khan BPF hi Congress nen an thawkho a, seat 12 an la. Kumin election-ah erawh Congress nena an thawhhona titawpin BJP an thlawp thung a ni.

BJP chief ministerial candi-date Sarbananda Sonowal chu Majuli bial aṭanga thlan tlin niin, Minister hlui Rajiv Lochan Pegu chu vote 18,923 zetin a hneh a ni. Sonowal hian vote 49,602 hmuin Pegu hian vote 30,679 a hmu.

Congress sorkar paihthlak a nih dan chu mi tam takin mak ti mah se mipui hawiher leh BJP huhang thlirin thil mak lutuk erawh niin a lang lo. Kum 2011 election khan Congress hian seat 78 laiin, chiang takin hnehna a chang a, kuminah erawh seat 26 chiah a la thung. Congress party bakah hian All India United Democratic Front (AIUDF) chu hnungtawlh zingah a tel a, 2011-a election-ah khan seat 18 lain, kuminah erawh seat 13 chauh a chang a ni. Hei mai hi a nilo a, AIUDF president Badruddin Ajmal chu a dinna South Salmara bialah a chak zo lo. AIUDF president hian vote 63,343 hmuin a khingpui Choudhury chuan vote 80,066 a hmu a ni.

Hetih lai hian AGP president Atul Bora chuan Congress candidate Arun Phukan chu vote 40,000 zeta hnehin Bokakhat bial aṭangin hneh taka thlan tlin a ni. Chief Minister hlui Prafulla Kumar Mahanta pawhin Congress candidate Suresh Bora hneh ve bawkin Barhampur bial aṭanga thlantlin a ni ve bawk. Senior BJP member Chandra Mohan Patowary chuan Minister hlui tho Nilamani Sen Deka chu Dharmapur bialah vote 33,000 chuangin a hneh. BJP State unit president ni ṭhin Ranjit Dutta pawhin hnehna changin, Congress candidate tho Rupak Sarma chuan a khing phak lo hle.

AGP hruaitu hlun Phani Bhushan Choudhury chuan Congress ticket-a Bongaigaon biala ding All Assam Students’ Union president Sankar Prasad Roy chu a hneh. Hei hi Choudhury tan thil chhinchhiah tlak tak a tling a, politics a luhchilh aṭanga a bul ṭanna Bongaigaon bialah hian a zawnin vawi sarih zet thlan tlin a ni tawh a ni. AGP sorkar laia minister te pawh lo ni tawh Pradip Hazarika chuan Congress candidate Angkita Dutta chu Amguri bialah a hneh a, Dutta hi APCC president Anjan Dutta farnu a ni. BJP canidate Hitendra Nath Goswami chuan Congress candidate Rana Goswami a hneh a, AGP hruitu hlun te zinga mi Brindaban Goswami pawhin Congress ṭhat ṭhinna bial Tezpur-ah Congress ticket-a ding Hiranya Bhuyan a hneh ve bawk.

BJP leh a thawhpui party te chu Guwahati-ah an che ṭha hle a, Dispur bialah chuan Atul Bora chuan Minister pawh lo ni tawh
ṭhin Akon Bora chu vote 1,30,197 zetin a hneh a, inhnehna sang ber te zinga mi a ni. Jalukbari-ah pawh Himanta Biswa Sarma chuan Niren Deka chu vote 85,935 chuangin a hneh a, a ni bakah hian BJP candidate Siddhartha Bhattacharya chuan Congress candidate Bobbeeta Sarma chu vote 96,639 chuangin a hneh ve bawk. Guwahati East-ah ve thung chuan AGP candidate Ramendra Narayan Kalita chu Congress candi-date Juri Sarma Bordoloi lakah vote 89,910 chuangin hnehna a chang a ni.

Assam Chief Minister ni lai Tarun Gogoi chu a dinna Titabor bial aṭangin thlan tlin a ni a, nimahsela an party an chet ṭhat loh avangin a lal ṭhuthleng a kalsan a ngai dawn a ni. Gogoi hian BJP candidate Kamakhya Prasad Tasa chu vote 17,495-in a hneh a ni. Gogoi bakah hian Congress candidate chuan Minister Ajanta Neog chuan BJP ticket-a Golaghat biala ding Bitupan Saikia chu vote 5,213 chuang hretin a hneh ve bawk. Assembly Speaker ni lai Pranab Gogoi pawh vannei zingah telin vote 542 chiahin a khingpui Surabhi Rajkonwar lakah hnehna a chang. Congress party candidate lawk tak tak zingah hnehna chang zo lo eng emaw zat an awm a, an zingah hian mi hausa tak tak leh Union Minister hial lo ni tawh te pawh an awm nuk a ni.

Election result puan anih hma hian kawng hrang hrangin sorkar tur inrinsiakna buatsaih a ni a, mi nawlpui ngaihdan lak aṭangin BJP chu sorkarna siam thei tura mite rin kai a ni a, a thleng dik ta a ni. Rinlawknaah hian BJP chu seat 80-90 vel chang thei tura ngaih an ni a, an thawhpui party te chuan seat 20-30 vel an lak an ring a ni. BJP chuan sorkarna siamtu tur an nih thu an sawi fo ṭhin. BJP State president Sarbananda Sonowal chuan mipuite thlawpna vanga hnehna chang thei an nih thu sawiin, an thawhpui party te a fak bawk.