Manipur : Meitei helpawl pasarih UAPA hnuaiah dan pawnah hnawl

Sorkar laipui thutlukna lo siam tawh, Meitei helpawl pasarih kum nga chhung atana dan pawna hnawl chu Unlawful Activities (Prevention) Act (UAPA) hnuaia Tribunal chuan a pawmpui.

Meitei helpawl pasarihte hi kum nga chhungin pawikhawihna 335-ah inhnamhnawihin, hei vang hian security mi leh sa pakua leh civil mi 21-in nunna an chân phah tih tarlan a ni. India aṭanga Manipur zalenna atana beitu helte chu Myanmar leh Bangladesh-ah inkhuarin, ralthuam chelek dan an zir bakah silai leh a mu pawh awlsam takin an nei thei ṭhin niin an tarlang. Heng helpawlte hi Nationalist Socialist Council of Nagaland (Isak-Muivah) nen an thawkho tih tarlan a ni bawk.

Union Ministry of Home Affairs (MHA) chuan Meitei helpawlte hian ram leilung fa ni lo an bitum ṭhin tih sawiin, Manipur chhunga hnam dang hel sorkar laipuiin inbiakna a neihpuite pawh an tihbuai ṭhin bakah, Republic Day boycott leh India rama Manipur behtir an dodal ṭhin tih tribunal hnenah a sawi. MHA report theh luh hian May 23, 2023-a chi leh chi inkara buaina chhuak leh thihna thleng erawh a sawi tel lo thung.

Heng helpawlte hi 1979 aṭang khan dan pawnah hnawl an lo ni tawh a, November 13, 2018 thleng khan a khât tawkin dan pawna hnawl an nihna hi pawhsei ṭhin a ni. MHA chuan tribunal hnenah Meitei helpawl dan pawna hnawl tak pasarihte hian mi leh sa 1,250 vel an nei mek tih a hriattir a, ralthuam ṭha tak tak an kawl bawk a ni, a ti.