MoEFCC-in Assam Special CS (Forest) insawi fiah turin a hriattir

Ministry of Environment, Forest and Climate Change (MoEFCC) regional office, Shillong chuan Assam Special Chief Secretary (Forest), MK Yadava hnenah ramngaw humhalh chhunga commando camp sak phalna a pek avangin insawi fiah turin a hriattir. Assam sorkar hmalakna hian Forest (Conservation) Act, 1980 a bawhchhia niin MoEFCC chuan an tarlang.

Sorkar laipuiin Yadava hi May 14 khan hremna an pek loh chhan tur sawi fiah turin a lo hriattir tawh a, ni 60 chhung hun an pe a ni. Yadava chuan insawi fiah tura hriattirna a put ru chu pawi a tih thu sawiin, Union Ministry hnenah pawh chhui turin thurawn a pek thu a sawi a, amah an kohna lehkha mipui hriata a darh chu mak a tih thu a sawi bawk. Special Chief Secretary, M K Yadava chuan ramngaw humhalh chhunga hectare 5000 laia zauah Mizoram lamin chet lakna nei mah se, sorkar laipui hnen aṭanga tawp tura thupek an la dawng lo chu a hrethiam lo tih a sawi bawk.

Damchera, Hailakandi district huam chhunga Inner Line Forest Reserve-a Assam sorkar chet lakna awmte chhui chian a nih hnuah Yadava hi phalna petu a nih avangin insawi fiah turin hriattir a ni a, Van (Sanrakshan Evam Samvardhan) Rules, 2023 hnuaiah hrem theih a ni ang.