Arunachal : NPP-in BJP candidate hnawl an phût

National People’s Party (NPP) chuan Arunachal Pradesh-a Rumgong biala Bharatiya Janata Party (BJP) aiawha ding, Talem Taboh chuan booth a thunun tia puhin candidate a nihna hnawlsak turin Chief Election Commissioner (CEC) an ngen.

NPP chuan thuthar thehdarhtute an kawmnaah, BJP MLA candidate chu booth thununnaa a inhnamhnawih bakah vawi tam tak vote a thlak nawn tih tarlangin, polling station-a presiding officer-in ti tawh lo tura a hrilh pawhin awmzia a nei lo tih an sawi. NPP chuan vote thlak lai hi CCTV hmanga enfiah a ni tih sawiin, Talem Taboh chet dan zawng zawng hi general observer, district election officer, returning officer leh polling station-a awm ve mi dangte'n an hmu vek a, Taboh vote thlak nawn lai hi CCTV-ah hmuh theihin a awm tih an sawi.

BJP candidate chet dan hian Representation of the People Act, 1951 leh India danpui hnuaia Section 135A, 324 leh 326 a bawhchhia tih an tarlang. 24-Yosing Dere polling station-ah booth thununna a thleng bawk tih sawiin, hemi chungchangah hian thuneitute'n thil thlen dan kimchang an hriat avangin an hmalakna an ngaichang mek niin a sawi. Talem Taboh chuan vote thlak nia zawm tur dan zam a bawhchhiat avangin man an phût tih NPP chuan an sawi a, vote chhiar a nih hmaa CEC lam aṭanga hmalakna a awm lo a nih chuan a ṭul anga hma an lak tur thu an sawi bawk.