Meghalaya : KAS-in Khasi ṭawng 8th Schedule hnuaia telh an duh

Khasi Authors’ Society (KAS) chuan India danpui, 8th Schedule hnuaia official language zingah Khasi ṭawng telh a nih theih nan ṭan lak an tum tih an tarlang. Hemi bakah hian Khasi ṭawng chu Meghalaya chhunga official language atana hman an duh tih an tarlang tel bawk.

KAS chuan General Council meeting-ah he thutlukna hi siamin, an pawl president DRL Nonglait chuan Khasi ṭawng 8th Schedule-a telh a nih theihna tura mipui thlawpna an neih theih nan Khasi-Jaintia leh Ri Bhoi hmunahte Khasi ṭawng chungchang inhrilh hriat bakah inzirtirna kalpui an tum tih a sawi. Sorkar laipuia sorkar thar piang tur pawh hemi chungchang hi sawipui an tum tih tarlangin, Khasi ṭawng 8th Schedule-a telh a nih theih nan KAS chuan hma an la zel dawn a ni, a ti.

Nonglait chuan 8th Schedule-a Khasi ṭawng telh bakah, Meghalaya official language atana hman mek English bakah Khasi ṭawng telh a nih theih nan Society chuan hma lak a tum tih a sawi bawk. Meghalaya Department of Arts and Culture leh KHADC nen ṭangkawpin KAS chuan Khasi-English dictionary an buatsaih mek tih a sawi a, nakum lamah chuan peih fel hman an inrin thu a sawi.

KAS hian ṭawng chungchang bakah an khawtlang nuna harsatna an tawh mekte chu meeting-ah hian sawi langin, hmalak dan tur an sawiho bawk. Khawtlang huapa harsatna an tawh mek- ruihhlo hman sual, HIV leh eirukna a tlem theih nan thu ziaktute'n ṭan an lak a ngai tih an tarlang.