Manipur-in remna a neih theih nan sorkar laipuiin hma a la : Amit Shah

Union home minister Amit Shah chuan Meitei leh Kuki inkara inrin loh tawnna awm tihbo a nih theih nan sorkar laipui chuan hma a la mek a, he hmalakna hi Lok Sabha inthlan zawh hnuah tun aia chak zawka kalpui an tum tih a sawi.

Amit Shah chuan Lok Sabha inthlan zawh fel a nih hnuah Manipur-a remna a awm theih nana hmalakna chu sorkar laipuiin a ngaih pawimawh ber a nih tur thu a sawi. "He buaina hi helna emaw buaina satliah emaw a ni lo a, chi leh chi inkara buaina a nih avangin tharum hmanga chin fel mai theih a ni lo," a ti. Buainain ziaawm lam a pan theih loh chhan pawh hnam pahnih inkarah inbiakna a tam tawk loh vang tih sawiin, tun hnaia buaina la thleng reng chuan a thusawi hi a nemnghet tih a sawi. Heng avang hian hnam pahnih inkara inrin tawnna a awm theih nan Meitei leh Kuki inkarah inbiakna a awm a pawimawh tih a sawi a ni.

Union Home Minister chuan Lok Sabha inthlan a awm avangin hmalakna a kal chak thei lo a, Manipur buaina chu hun rei lote chhunga chin fel mai chi a nih loh thu sawiin hun a mamawh dawn a ni, a ti. Shah chuan hnam pahnih hruaitute pawh inthlan lai chuan politics thilah an buai tih sawiin, vote chhiar zawh a nih hnuah erawh tha thara hmalakna a awm ngei dawn a, "Hun lo awm turah chuan buaina hi a awm tawh ka ring lo," a ti.

Manipur buaina hi May 3, 2023 a inṭan niin hriat theih chinah mi 220-in nunna an chân tawh a, thi zingah hian Meitei leh Kuki-Zo hnam bakah venghimtute pawh an tel. Hnam hnihte hi an inchen pawlh tawh loh avangin raltlan tam tak an awm bawk. Buaina hian ziaawm lam a pan thei lo a, village volunteer-te chu khaw venghim tura dah ṭhin an ni.