WMC-in Meitei hnam Tribal nihna pek phûtin nawrh an huaihawt

World Meetei Council (WMC), Assam unit chuan Nandapur Charali, Assam-ah nawrh huaihawtin Meitei hnam chu Schedule Tribe nihna pek ve an phût. WMC (Assam Unit) bakah Meitei hnam pawl hrang hrang- Apunba Meira Paibi Lup Brahmaputra Valley (AMPLBV), Assam Pradesh Manipuri Association (APMA) leh United Manipuri Association Assam (UMAA) te chuan nawrh huaihawtnaah hian an telpui.

WMC chuan Manipur chief minister N Biren Singh chu sorkar laipuiiin a phût, Meitei hnam chungchang report a pek loh chhan an hriatthiam loh thu an sawi. Report hi sorkar laipui hnenah pe tura an duh thu leh, a bak chin fel ngai chu a ṭul angin sorkar laipui chuan a buaipui zui mai dawn tih an sawi. Assam-a Meitei chengte hian tribal zinga chhiar tel an nih theih nan hma an la reng a ni.

India danpui hnuaia tribal nihna pek an nih chuan Assam-a Meitei hnamte chu an him dawn tih WMC chuan an tarlang a, hemi a nih avang hian report ṭul ang chu Ministry of Tribal Affairs hnenah pe thuai turin N Biren Singh chu an ngen a ni. Sorkar laipui hnena report theh luh a nih hnuah thil a kal tluang a nih chuan, kum 2026 hmain Assam Meitei-te chu tribal nihna pek hman an nih an beisei tih WMC chuan an tarlang.