Cyclone Remal hmachhawn turin kan inpeih : Tripura CM

Tripura chief minister Dr. Manik Saha chuan Cyclone Remal lo thleng tur hmachhawn turin an state chu an inpeih tih sawiin, state mipuite chu hlauthawng lo turin a chah.

Cyclone-in a ken tel thli leh ruahin hmarchhak state tam tak a tuam dawn a, hei vang hian India Meteorological Department (IMD) chuan Meghalaya, Assam, Tripura, Manipur, Nagaland leh Mizoram-ah ni thum chhung ruah sur a tam dawn tih tarlangin, thli (30 - 50 km/hr) a tleh dawn avangin heng state paruk tan Pathianni khan Orange alert a tichhuak a, Arunachal Pradesh tan Yellow alert a tichhuak bawk a ni. Nimin atan khan IMD chuan state pali Meghalaya, Assam, Tripura leh Mizoram tan Red alert a tichhuak leh bawk.

Tripura CM chuan an state chhungah Cyclone Remal ken tel thli leh ruah a thawk dawn tih sawiin, mipuite chu chiai lo turin a chah a, hemi rual hian mipuite chu fimkhur turin a chah tel bawk. Tripura sorkar hian sikul chawlh a puan bakah, National Disaster Response Force (NDRF) leh chhanchhuaktu pawl dangte chu chhiatna thlen theihna hmunah an tir chhuak a ni.